Politika dhe politikanët

Nga Samed Dërmaku – Politika njihej si veprimtari fisnike, deri në momentin kur njeriu u fut në politikë për të realizuar synimet dhe ambiciet personale, e formuluar dhe arsyetuar teoritikisht, në njëfarë mënyre nga Makiaveli, ku kishte thënë se: ‘Qëllimi arsyeton mjetin’! Këtu zë fill antipodi i konceptit antik të politikës i konceptuar nga Platoni dhe Aristoteli, ku si funksion të politikës parashihnin realizimin e të mirës së përgjithshme, nga njerëzit më të dijshëm dhe më të virtytshëm.

Në një ligjëratë nga sociologu Max Weber, pothuajse para një shekulli e njohur si: ‘Politika si profesion’, ndër të tjera thekson edhe dy gjëra sa i përket politikës dhe politikanëve.

E para, ai potencon se: ‘Njeriu në moment që futet në politikë, në njëfarë mënyre, një pjesë të shpirtit ia dorëzon djallit’!

Aktualiteti politikë në Kosovë po dëshmon çdo ditë e më shumë, se këtu e pothuajse tek të gjithë shqiptarët kudo, politikanët tanë në momentin e futjes në politikë, jo një pjesë, po tërë shpirtin po ua falin djallit!

E dyta, Weber thekson se: ‘Ekzistojnë politikanë që jetojnë PËR politikën dhe politikanë që jetojnë NGA politika’. Fatkeqësisht, në politikën kosovare e shqiptare në përgjithësi, jemi dëshmitarë se, nga shembja e komunizmit në Shqipëri e paslufta në Kosovë, të pakët ishin ata politikanë që ‘jetuan PËR politikën, e shumica e tyre jetuan e po jetojnë NGA politika’!

Këtu tek ne ka edhe të atillë politikanë që synojnë për ta bërë politikën shkencë e të krijojnë kulte, këto tendenca janë të rrezikshme, sepse kjo mund shpie një vend drejt një shoqërie diktatoriale dhe despotike. Si do që të jetë, sot politika është bërë profesioni më profitabil dhe në anën tjetër nocioni më i urryer nga qytetarët!

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).