Policia e Gjilanit fushatë kundër përdorimit të rrezikshëm të laserëve nga të rinjtë

Gjilan – Policia e Kosovës, përkatësisht Drejtoria Rajonale në Gjilan përmes Njësive të Sektorit për Komunitet, ka nisur realizimin e projektit “Parandalimi i përdorimit të rrezikshëm të laserëve nga të rinjtë”, me aktivitete sensibilizuese që synojnë rritjen e vetëdijes dhe parandalimin e incidenteve që cenojnë sigurinë publike.

Në kuadër të këtij projekti, zyrtarët policorë po mbajnë ligjërata vetëdijësuese me nxënës të shkollave fillore dhe të mesme, takime informuese me stafin arsimor dhe këshillat e prindërve lidhur me mbikëqyrjen e fëmijëve në përdorimin e pajisjeve laserike, si dhe po vendosin postera informues në lokacione me frekuentim të lartë qytetarësh.

Përmes këtyre aktiviteteve synohet njoftimi i nxënësve, prindërve dhe qytetarëve mbi pasojat dhe rreziqet që mund të shkaktojë përdorimi i pakontrolluar i laserëve. Autoritetet rikujtojnë se drejtimi i rrezeve laser drejt personave, automjeteve apo mjeteve ajrore përbën veprim të rrezikshëm dhe të dënueshëm, që mund të shkaktojë pasoja serioze për shëndetin, sigurinë në komunikacion dhe rendin publik.

Përmes kësaj fushate parandaluese, Policia synon të shmangë raste të tilla, të mbrojë jetën dhe shëndetin e qytetarëve dhe të garantojë një ambient të sigurt për të gjithë./rajonipress/