Podrimja harrohet në vendin e vet, përkujtohet në Lodeve

Në ceremoninë e hapjes së Festivalit, u përkujtua poeti Ali Podrimja, i cili një vit më parë humbi jetën pikërisht në këtë vend. Ndryshe prej vendit të vet, ku nuk u organizua asnjë aktivitet në njëvjetorin e vdekjes së tij, në Lodeve nuk u lanë pa përmendur dhe vargjet e tij si një testament poetik, ku poeti shprehte dëshirën të vdiste me sytë hapur duke parë nga qielli, ashtu siç ndodhi në realitet.

Ali Podrimja kishte humbur kontaktet me kolegët dhe miqtë e familjarët e tij, në kohën kur po qëndronte në Francë në kuadër të festivalit të poezisë “Voix de la Méditerranée”, në qytetin e Lodeve.

Trupi i tij u gjet i pajetë pranë lumit të qytetit. Ai u vlerësua në këtë ceremoni si përfaqësuesi më tipik i poezisë së sotme shqiptare. Poezia shqipe këtë vit përfaqësohej nga poetja Rita Petro (Filipi) nga Shqipëria dhe poeti i ri nga Kosova Ndriçim Ademaj.( Tribuna)