Piraj premton reforma

Gjilan – Delegatët e Odës së Avokatëve në regjionin e Gjilanit me shumicë votash kanë zgjedhur kryetar të saj avokatin e njohur Shemsedin Piraj i cili njëkohësisht ka premtuar reforma, avancim dhe mbrojtje të dinjitetit të avokatëve.

Oda regjionale e avokatëve të Anamoravës ka zgjedhur për kryetar të saj në një mandat katërvjeçar avokatin e njohur Shemsedin Piraj. Kuvendi i Odës së Avokatëve gjithashtu ka aprovuar raportin e punës dhe atë financiar të Abdylazis Sadikut ish kryetar i këtij asociacioni.

Mbi 51 avokatë llogaritet se i ka regjioni i Gjilanit. Shemsedin Piraj tha për rajonipress se detyrë e tij dhe prioritet do të ketë mbrojtjen dhe dinjitetin e avokatëve. Piraj tha se do të angazhohet që në fushën e avokaturës të sjellë reforma, transparencë, bashkëpunim profesional dhe komunikim të nivelit ndërkombëtarë.

Piraj tha se do të bëjë çmos që përmes kurseve, trajnimeve e seminareve të ndryshme të përgatisë kuadro të reja në fushën e avokaturës, derisa mendon të bëjë edhe një lidhje kolegiale dhe transparente edhe me gjykatat, prokurorinë e policinë.

Ndryshe Shemsedin Piraj është njëri nga avokatët e pakët kosovar që ka marrë pjesë në seancat e ndryshme në Tribunalin e Hagës./rajonipress/