Nëse Kombëtarja Shqiptare veç i ka bashkuar gjithë shqiptarët rreth vetes, pavarësisht vendeve se ku jetojnë ata, atëherë personaliteti i vitit 2015 pa dyshim që ka qenë Gianni De Biasi, shkruan Zëri.
Këtë epitet ia arsyeton edhe fakti se trajneri italian i ekipit kuqezi edhe me letra është bërë shqiptar. Ai është arkitekti i suksesit historik të futbollit mbarëshqiptar.
Nën drejtimin e tij, skuadra shqiptare bëri ndryshim drastik, përparoi jashtëzakonisht shpejt dhe me hapa të sigurt u bë tipike evropiane. De Biasi e drejtoi me plot sukses Shqipërinë drejt Kampionatit Evropian “Franca 2016”, duke e realizuar ëndrrën e kahershme të Shqiponjave, raporton Zëri. Gjatë këtij rrugëtimi, Shqipëria dhe shqiptarët bënë marketing pozitiv nëpër botë. De Biasi është një hero i kohës sonë. /Zëri/
