Për Gashin shpreh interesim edhe Atalanta

Shtohet lista e skuadrave të Serisë A që kërkojnë shërbimet e futbollistit të Kombëtares Shqiptare, Shkëlzen Gashi.

Pas Veronës dhe Fiorentinës, sulmuesin e Baselit në kampionatin zviceran e ndjek me shumë vëmendje edhe Atalanta, që synon të gjejë një alternativë të përshtatshme të Maxi Morales, tashmë i kthyer në Argjentinë te Leon. Te Gashi drejtuesit e Atalantës kanë pikasur profilin e futbollistit që mund të kontribuojë si sulmues krahu në të majtë, por dhe në të djathtë.

Për shkak të marrëdhënieve të vështira me trajnerin e Baselit, Gashi është aktivizuar në vetëm 5 takime të kampionatit gjatë këtij sezoni, duke shënuar dy gola. Edhe pse minutazhi në këmbët futbollistit shqiptar gjatë 5 muajve të fundit është i kufizuar, stafi teknik i Atalantës beson te potenciali i tij, duke u bazuar edhe në faktin se vetëm një apo dy sezone më parë, ishte ndër golashënuesit më të mirë të Superligës së Zvicrës, transmeton Supersport.

Vetë Gashi është shumë i interesuar për të ndryshuar ambient, pasi dëshiron të luajë në vazhdimësi për të fituar një vend në formacionin e Gianni De Biasit gjatë finaleve të “Francë 2016″.