PDK: Anarki në qytetin e Gjilanit, ndërtimet pa leje janë jashtë kontrollit

Gjilan – PDK në Gjilan, ka kohë që e ka ngritur zërin se brenda Drejtorisë së Inspeksionit ekziston një kaos dhe gjithçka është jashtë kontrollit. Por, të paktën ka besuar se tek ndërtimet e larta nuk ka tejkalime dhe po punohet sipas lejeve ndërtimore. Por, javët dhe ditët e fundit, kemi disa reagime të vazhdueshme nga qytetarët e Gjilanit të cilët pyesin se a jeni duke e ngritur zërin për ndërtimet pa leje dhe tejkalimet që po ndodhin tek ndërtimet e larta (poashtu duke na dërguar edhe foto konkrete)?

Prandaj, i kërkojmë inspeksionit që të verifikoni rastin në fjalë i cili ndodhet në “Fidanishte” (përgjatë rrugës qarkore) dhe ku po zhvillohen ndërtimet në katin e fundit (me gjasë mbindërtim pa leje).

PDK-Dega në Gjilan shpreson se diçka e tillë nuk qëndron, të kundërtën dorëheqja e kryetarit të komunës do të ishte akti më i paktë që do të duhej t’a bënte, sepse pa koordinim me të, nuk besohet se Drejtoria e Inspeksionit do të kishte guxim ti mbyllte sytë në raste të tilla, sepse ajo pjesë, me siguri për çdo ditë monitorohet.

Poashtu, PDK-Dega në Gjilan do të vazhdoj të merret me të gjitha rastet e ndërtimeve të larta, duke filluar prej dhënies së Lejeve të Ndërtimit (nëse janë dhënë konform ligjit dhe planeve rregulluese) e deri tek ndërtimet pa leje dhe tejkalimet e tyre./rajonipress/