Panairi i produkteve vendore në Kamenicë vazhdon të jetë i hapur për vizitorë edhe sot

Kamenicë – Në sheshin e qytetit po mbahet Panairi i Produkteve Vendore, një aktivitet që ka mbledhur prodhues dhe biznese lokale për të prezantuar produktet e tyre para qytetarëve dhe vizitorëve.

Panairi për dy ditë radhazi ka ngjallur interesim të madh, ku qytetarë të shumtë vizituan stendat dhe u njohën nga afër me produktet cilësore të bizneseve vendore, duke mbështetur kështu prodhimin dhe ekonominë lokale.

Bizneset pjesëmarrëse i vizitoi edhe Drejtori i Zhvillimit Ekonomik, Edon Dermaku, së bashku me stafin e drejtorisë.

Gjatë vizitës, ai bisedoi me përfaqësuesit e bizneseve, duke vlerësuar angazhimin e tyre në promovimin e produkteve vendore dhe kontributin që japin në zhvillimin ekonomik të Komunës së Kamenicës.

Ky panair po i jep një pamje të bukur qytetit, duke krijuar një atmosferë të gjallë dhe duke shërbyer si një mundësi e mirë për promovimin e potencialit ekonomik lokal.

Panairi vazhdon të jetë i hapur edhe sot, ndaj ftojmë të gjithë qytetarët ta vizitojnë dhe të njihen me produktet vendore që ofrohen nga prodhuesit e Komunës së Kamenicës./rajonipress/