Opozitarët: Thaçi iku – aty ku nuk sfidohet

Ndërprerjen e fjalimit dhe largimin e kryeministrit të Kosovës Hashim Thaçi, nga seanca e sotme e Kuvendit të Kosovës, partitë opozitare e vlerësojnë për Telegrafin si ikje nga përgjegjësia që duhet ta ketë.

Sipas Lëvizjes Vetëvendosje, kryeministrit nuk i pëlqeu e vërteta e cila paraqitej në pankartë, ku ilustrohej gjymtimi i territorit të Kosovës që, sipas VV-së, po e bën Thaçi në negociata me kryeministrin serb, Ivica Dacic.

Kreu i Ekzekutivit ndërpreu fjalimin në Kuvend, pasi deputet e Lëvizjes Vetëvendosje, para foltores hapën një pankartë me mbishkrimin “Kosova e Hashimit”.

“Hashim Thaçi e di që argumentet janë në anën tonë. Në pamundësi për t’u përballur me to publikisht, ikë nga Kuvendi dhe mban konferencë për media në zyre të Qeverisë, aty ku nuk ka kush ta sfidojë”, tha Erzen Vraniqi për Telegrafin.

Deputeti i AAK-së, Burim Ramadani, në një prononcim për Telegrafin tha se Thaçi është dashur që të kthehet në sallë pas pauzës.

“Më i rëndësishëm është informimi i deputetëve për atë që ka ndodhur në Bruksel, sesa konferencat për media”, ka thënë ai.

Deputetja e LDK-së, Vjosa Osmani, largimin e Thaçit nga seanca e Kuvendit e vlerëson si ikje nga përgjegjësia.

“Ai ikë nga obligimet për raportim që dalin nga rezoluta e miratuar në Kuvend”, ka deklaruar Osmani. /Telegrafi/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).