Opozita e vendosur: Nuk takohemi me Thaçin për reformën zgjedhore

​Partitë opozitare LVV, AAK, dhe Nisma për Kosovën, ditë më parë refuzuan takimin e parë që thirri presidenti Hashim Thaçi, për të diskutuar reformën zgjedhore. Opozita vazhdon të ketë qëndrim të njëjtë, duke thënë se sa i përket kësaj çështje nuk do të pranojnë as edhe një takim me Thaçin.

Deputeti i VV-së, Rexhep Selimi, thotë se nuk do të shkojnë në takim për asnjë reformë zgjedhore.

“Ai nuk është president për ne, edhe në raste më të thjeshta ai nuk është president për mënyrën e zgjedhjes. Ai as që do të duhej të bënte ftesa të tilla, po të kishte pak moral e dinjitet nuk do ta mendonte këtë takim”, ka thënë Selimi.

Nga ana tjetër, Pal Lekaj nga AAK, thotë se tani nuk është koha për reforma zgjedhore marrë parasysh që vendi është në krizë.

Ai ka thënë se presidenti i vendit duhet të thërras që vendi të shkoj në zgjedhje dhe jo të thërras për reforma.

“Sa i përket qëndrimit e kemi thënë se ne nuk do të shkojmë në takim të presidentit për asnjë reformë zgjedhore, përveç atëherë kur e bënë shtetin me shku në zgjedhje. Kosova është në krizë dhe në këtë rast reforma i jep hapësirë kësaj qeverie”, ka thënë Lekaj për Indeksonline.

Kurse, Valdete Bajrami nga Nisma, konsideron se Thaçi nuk përfaqëson unitet dhe se këtë iniciativë duhet ta ndërpresë.

“Thaçi tashmë e dinë besoj se edhe atë ftesë që e bëri ditë më parë nuk i shkoi ashtu siç ai do të donte, por edhe nëse bënë ftesë prapë ne do t’i përgjigjemi njëjtë, ashtu siç vepruam më parë. Ai duhet ta ndërpresë këtë iniciativë sepse është joserioze, për faktin se është po i njëjti njeri i cili për 7 vite me radhë ka qeverisë me vendin, dhe po ky njeri ka qenë penguesi i bërjes se reformës zgjedhore. Prandaj, për ta bërë një reformë të mirëfilltë zgjedhore duhet kohë dhe mbi të gjitha unitet, as njëria e as tjetra nuk janë për momentin pasi që ka mundësi që të kemi zgjedhje të jashtëzakonshme dhe tjetra se Thaçi nuk është njeriu që përfaqëson unitet por vetëm përçarje, dhe po ashtu duhet të dijë se reforma nuk mund të bëhet pa opozitë”, ka thënë Bajrami