Nevzadi shpreh shqetësimin për lapidarët e dëmtuar në fshatra

Gjilan – Veton Nevzadi, drejtor për Kulturë Rini dhe Sport, tha se ka vizituar lapidarët nëpër fshatrat Zhegovc e Cërrnicë ku ka vërejtur se ato në një masë të madhe janë të dëmtuara nga faktori kohë. Nevzadi ka kërkuar nga kreu i komunës një fond për të mbikëqyrur këta lapidarë.

Në takimin e fundit të bordit të drejtorëve Veton Nevzadi drejtor për kulturë, rini e sport ka raportuar për një shqetësim të tij që lidhet me gjendjen e lapidarëve nëpër fshatrat e Gjilanit.

Nevzadi ndërkaq për rajonipress tha se ka vizituar fshatrat Zhegovc dhe Cërrnicë dhe ka vërejtur se lapidarët atje janë bukur të dëmtuar për shkak të faktorit kohë. Nevzadi tha se ka kërkuar nga kryetari i Komunës që të lëshohet një fond për të mirëmbajtur lapidarët sepse në të kundërtën ata edhe më shumë mund të dëmtohen.

Nevzadi gjithashtu ka folur edhe për Muzeun e qytetit të Gjilanit për të cilin ka thënë se po bëjnë gati projektin për të filluar rregullimin e këtij muzeu që është shumë domethënës për kulturën dhe trashëgiminë e Anamoravës./rajonipress/