Në Viti mbahet Panairi i prodhimeve vendore : “T`i ruajmë vlerat tona tradicionale”

Viti – Në Viti sot është mbajtur Panairi i prodhimeve vendore me moton “Ti ruajmë vlerat tona tradicionale”, i cili mbahet për të katërtën herë me radhë. Ky panair i prodhimeve vendore, konsiderohet si një ngjarje e veçantë e prezantimit të vlerave tradicionale, si në prodhimtarinë e kulturave bujqësore, blegtorale, sofrën tradicionale, punimeve artizanale, etj.

Duke shpallur të hapur këtë panair, kryetari i komunës Sokol Haliti theksoi se produktet e shumëllojshme i përkasin shijeve të veçanta organike dhe me cilësi të veçanta të prodhuara nga dora e fermerëve shumë të vyer e me traditë të komunës së Vitisë. “Natyrisht këto produkte dhe këto promovime kanë kthyer vëmendjen drejt asaj që shpesh e quajë çelës i rritjes ekonomike dhe çelës drejt sektorit i cili vazhdon të rezistojë edhe kur gjithë sektorët tjerë shënojnë rënie”, tha Haliti.

Ndërsa drejtori i Bujqësisë dhe Pylltarisë në Viti Veton Ademi, theksoi se fermerët vitias kanë nevojë për përkrahje në forma të ndryshme dhe institucionet komunale do të bëjnë përpjekje që në të ardhmen t`i ndihmojmë fermerët si me ofrimin e këshillave,subvencioneve, infrastrukturë rurale etj. “Ne si Drejtori e Bujqësisë dhe përmes mbështetjes që do të kemi nga Ministria e Bujqësisë dhe institucionet tjera, do të arrijmë që këtij sektori t`i japim prioritetin që e meriton, e realizim të projekteve të reja dhe me një përkrahje edhe më të madhe institucionale në të ardhmen, pasi që dihet se komuna e Vitisë është e njohur në vendin tonë për prodhimtarin bujqësore”, tha Ademi.

Për rëndësinë e organizimit të këtij panairi, folën edhe Ekrem Bajrami drejtor i Iniciativës për Komunitet IKC dhe Fadile Demelezi koordinatore e Grupit Lokal të Veprimit në Viti.

Në këtë panair u shpërblyen edhe disa fermerë të dalluar të komunës së Vitisë, ndërkohë Pro Credibank i ka dhuruar atyre makina për spërkatje.

Organizatorë të këtij panairi ishin Drejtoria për Bujqësi, Pylltari dhe Zhvillim Rural dhe Grupi Lokal i Veprimit “Vitia” në Viti, në bashkëpunim me organizatën “IKC”( Initiative for Kosova Community). /rajonipress/