Në festën e shqiptarëve nuk pati humbës

Prishtinë – Futbollistët e Përfaqësueses së Kosovës krijuan një kolonë në hyrje të fushës së blertë, shkruan sot “Koha Ditore”.

Mes kolonës u shtrua një tepih i kuq dhe mbi të, nën brohoritjet e më shumë se 20 mijë shikuesve në stadium, parakaluan futbollistët e Kombëtares shqiptare. Ishte një nder për ata që siguruan kualifikimin historik në Evropian, për çka edhe u organizua kjo ndeshje ndërmjet Kosovës dhe Shqipërisë.

Por, me të nisur ndeshja në stadiumin e stërmbushur të qytetit në Prishtinë, nuk vërehej shumë se kush ishte skuadra e kualifikuar në Evropian e kush e izoluar nga garat ndërkombëtare apo fare.

Ndeshja u mbyll baras 2:2, por reprezentuesit e Kosovës krijuan më shumë raste shënimi.

Topin e parë të ndeshjes e nisën dy mbrojtësit, Armend Dallku e Debatik Curri që paraprakisht u përshëndetën nga Kombëtarja e Shqipërisë.

Ata më pas i lanë vend një ndeshjeje plot emocione, ku çdo aksion dhe gol duartrokitej nga tifozët në shkallët e stadiumit.
Ethe e aksione pati në pjesën e parë, por në të dytën pati edhe gola, madje katër.

Bersant Celina (59′) nga penalltia dhe Elbasan Rashani (70′) ishin realizatorë për Kosovën, derisa golat për Shqipërinë i realizuan Rei Manaj (56′) dhe Amir Rrahmani (74′).

Për Kosovën ky ishte barazimi i parë ndaj Shqipërisë, pasi dy të parat i ka humbur, më 1993 (3:1) dhe më 2002 (1:0). Një ndeshje Kosova ka humbur edhe ndaj Përzgjedhjes së Superligës së Shqipërisë më 2010 (3:2).

http://koha.net/?id=6&l=84174