Nano: S’jam sëmurë, por jam si kokrra e mollës

Ndërkohë që në blogjet e internetit qarkullon lajmi se ish-kryeministri socialist është sëmurë, Fatos Nano në një prononcim për “GSH” deklaron krejt të kundërtën. Duke u nisur nga lajmet e publikuara “on-line”, “Gazeta Shqiptare” ka arritur të kontaktojë me ish-kryetarin e PS-së, i cili e ka mohuar këtë fakt, duke përgënjeshtruar të gjitha zërat që thuhen për shëndetin e tij.

Duke marrë shkas edhe nga festa e Kurban Bajramit, ish-kryeministri ka dërguar mesazhin me këtë tekst në redaksinë e gazetës: “Gëzuar Kurban Bajramin…! Kur të mësojnë shqipen zyrtare shpellarët e blogjeve, edhe mund të ‘sëmurem’. Deri atëherë jam si kokrra e mollës! Kurban sitet!”.

“Ish-kryeministri Fatos Nano, i sëmurë”. Ky është lajmi që prej disa ditësh qarkullon në disa site online në vendin tonë, sipas të cilave, ish-kryeministri prej disa ditësh ndodhet në gjendje jo të mirë shëndetësore. Një fakt i tillë ka marrë përmasa edhe më të mëdha në momentin që shume site online, e kanë përhapur lajmin përmes rrjetit social të “Facebook”-ut.

Kanë mjaftuar disa minuta që shumë prej përdoruesve të këtij rrjeti ta përhapin lajmin dhe të ngrihen shumë pikëpyetje rreth shëndetit të ish-kryeministrit Fatos Nano. Një prej këtyre siteve, është edhe ai i Kohasot.eu, ku thuhet se në datën 1 tetor, ish-lideri i Partisë Socialiste, në të njëjtën kohë edhe ish-kryeministri i vendit, ka pësuar një incident të vogël, teksa ka qenë duke u shoqëruar nga bashkëshortja e tij, Xhoana.

Duke iu referuar gjithmonë siteve online, familjes Nano iu është shpuar goma e makinës në zonën pranë Tiranës së Re dhe kjo ka detyruar ish-kryeministrin që të dalë nga makina e tij, duke iu dridhur gjunjët. “Në këto momente z.Nano del nga makina, që dallohej qartë që mezi e mbanin këmbët, dhe në të mijtën e sekondës vjen karroatreci dhe transporton makinën e ish-kryeministrit. Nga burimet e Kohasot.eu, njoftohet se z.Fatos Nano ndodhet në gjendje të rëndë shëndetësore. Këtë fakt e konfirmuan edhe burime pranë vendit të ngjarjes”, citohet në sitet online.