Mustafa tregon se a do të rinegociohet marrëveshja për Asociacionin

Kryeministri Isa Mustafa thotë se çështja e pezullimit të marrëveshjes për Asociacionin është e natyrshme.
Ai thotë se do të varet nga vendimi i Kushtetueses në lidhje me hapat e mëtutjshëm sa i përket marrëveshjes për Asociacionin e Komunave Serbe.

“Mendoj se çështja e pezullimit është e natyrshme se edhe po të mos kishte një vendim të tillë, objektivisht do të pezulloheshin të gjitha veprimet sa i përket Asociacionit derisa Gjykata të mos sjellë ndonjë vendim”, ka thënë Mustafa në një intervistë për RTK-në.

Thotë se është e panatyrshme të punohet në implementim të marrëveshjes derisa ajo është në shqyrtim. Por, thotë se pezullimi nuk do të thotë se marrëveshja është anuluar.

“Është e panatyrshme të punohet në implementimin e marrëveshjes derisa çështja është në shqyrtim pranë Gjykatës Kushtetuese. Pezullimi nuk do të thotë se marrëveshja është anuluar ose është vlerësuar, por nënkupton se Gjykata Kushtetuese e ka marrë në trajtim dhe posa ta marrim vendimn ne do të veprojmë në bazë të vendimit të Gjykatës Kushtetuese”, ka thënë Mustafa për RTK-në.

Ai ka thënë se dialogu me Serbinë do të vazhdojë. Ka folur edhe për funksionimin e koalicionit PDK-LDK, duke thënë se ky koalicion do të funksionojë deri në vitin 2018.

“Dialogu me Serbinë do të vazhdojë. Ne do të funksionojmë deri në qershor t ëvitit 2018 pa asnjë pengesë sepse kemi 2/3 në Kuvend dhe kemi një popozitë e cila hedh vetëm gaz lotësjellës në Kuvend dhe nuk e ka shumicën”, ka thënë Mustafa.