Mustafa thotë se s’do të bëjë koalicionin me PDK-në

Kreu i LDK-së, Isa Mustafa, ka mohuar mundësinë që pas zgjedhjeve të ardhshme nacionale në Kosovë të bëjë koalicion me PDK-në e Hashim Thaçit.

“Nuk ka asnjë bisedë tani lidhur me koalicione. Nuk është biseduar në takimin tonë për asnjë koalicion, sepse kjo nuk është diskutuar as në Këshillin e Përgjithshëm të LDK-së. Në Këshill të Përgjithshëm merret vendimi për koalicion. Ka spekulime të ndryshme sepse përmes spekulimeve dëshirohet që të zbehet në një formë e gjithë kjo punë që po bëhet në LDK”, ka thënë Mustafa, të dielën në Prizren, gjatë një takimi me strukturat e degës së LDK-së. “Ne do të punojmë shumë që PDK-në ta qesim në opozitë. Dhe një parti që dëshirohet të qitet në opozitë, natyrisht që s’mendohet që të bëhet koalicion me të, sepse ne ndryshimet nuk mund t’i bëjmë në të ardhmen nëse nuk ndryshohen partnerët, me të cilin do të qeverisim në periudhën e ardhshme”, ka shtuar më tej ai.

Mustafa ka sqaruar se në takimin e fundit me kreun e PDK-së, Hashim Thaçi është kërkuar që zgjedhjet të mbahen në qershor, për të cilën ekziston një pajtueshmëri në parim por jo edhe vendim përfundimtar, pasi paraprakisht duhet të përcaktohet agjenda për aprovimin e ligjit zgjedhor, datën e shpërndarjes së Kuvendit dhe shpalljen e zgjedhjeve nga Presidentja e vendit.

“Si LDK kemi kërkuar që zgjedhjet të mbahen në qershor të këtij viti. Kemi konsideruar se deri në qershor mund të bëhen përgatitje të mira”, ka thënë Mustafa.