Mustafa të pakënaqurve: Unë jam kryetari

Kryetari i Lidhjes Demokratike të Kosovës, Isa Mustafa, ka deklaruar sot se Kosova nuk duhet të hyjë në bisedime politike me Serbinë për të rregulluar çështjet e saj të brendshme.

Ai ka thënë se bisedimet me Serbinë kanë marrë fund në Vjenë, prandaj me Serbinë mund të bisedohet vetëm si dy shtete të pavarura.

Sa u përket deklaratave të baroneshës Catherine Ashton se Kosova dhe Serbia duhet të përgatiten për vendime të vështira, Mustafa ka thënë se vendimet e vështira Kosova i ka marrë me pranimin e Pakos së Ahtisaarit, pranoj nuk guxohet të shkohet më tutje.

Ai ka folur edhe për mandatin e presidentes Atifete Jahjaga. Sipas tij, ajo duhet të respektoj marrëveshjen e prillit të vitit të kaluar.

“Përgjegjës për mosrespektimin e marrëveshjes është kryeministri Thaçi dhe presidentja Jahjaga”, ka thënë Mustafa për rtk.

“Kjo është mospërfillje nga Jahjaga, sepse ajo ishte e informuar për marrëveshjen, e ka pranuar si të tillë dhe këtë e ka thënë edhe në Kuvend që ajo po zgjedhet vetëm sa të kaloj reforma”, ka thënë i pari i LDK-së, duke shtuar se ai nuk sheh asnjë arsye që Jahjaga të qëndroj më shumë në atë post.

Sa u përket zërave të ditëve të fundit se një pjesë e anëtarëve të LDK-së po kërkon kthimin e Fatmir Sejdiut në krye të kësaj partie, Mustafa ka thënë se këto pretendime janë të shëndosha dhe nuk ka asgjë të keqe.

“Në zgjedhjet e ardhshme njerëzit mund të kenë pretendime dhe ato janë të shëndosha, por deri atëherë ata duhet të mësohen se unë do të jem kryetar dhe duhet të mësohen ta pranojnë gjendjen reale”, ka përfunduari ai.