Mustafa, opozitari “koordinues”

Kreu i partisë më të madhe opozitare, Isa Mustafa, po e luan kohëve të fundit detyrën e koordinatorit të veprimeve ndërpartiake për ta quar vendin në zgjedhje të parakohshme. Në cilësinë e liderit opozitar që nga partia është nominuar për kryeministër të ardhshëm të vendit, ai po punon që zgjedhjet të mbahen në pjesën e parë të këtij viti.

Në fakt, për këtë ai është marr vesh me liderin e partisë më të madhe në vend, Hashim Thaçin, në takimin që e kishin më 14 shkurt, ku janë pajtuar që zgjedhjet të mbahen në qershor.

Por, i sprovuar nga dështimi i një marrëveshje të mëhershme që kishte me Thaçin për zgjedhjet presidenciale, Mustafa krahas ujdisë së arritur me kreun e PDK-së po sigurohet mirë që zgjedhjet të mbahen në qershor. Për këtë qëllim, ai po kërkon mbështetjen edhe të partive tjera opozitare. Pas takimit me Thaçin, kryeopozitari Mustafa i ka takuar edhe krerët e AAK-së dhe të AKR-së, ndërsa ditëve në vijim pritet të takojë edhe kreun e Vetëvendosjes, Albin Kurti.

Zyrtarja e lartë e LDK-së, deputetja Vjosa Osmani, ka thënë se gjendja e krijuar në Kuvendin e Kosovës dhe nevoja për zgjedhje sa më të shpejta për të krijuar institucione të reja e ka shtyrë partinë më të madhe opozitare që të luajë rolin e vet për arritjen e konsensusit politik, një rol të cilin, sipas saj do duhej ta merrte edhe presidentja e vendit. /Tribuna/