Musliu: Serbinë e pengojnë edhe shqiptarët e vdekur

Gjilan – Pengimi i varrimit të mërgimtarit të ndjerë Hetem Bediu, nga policia serbe në pikën kufitare të Dobrosinit, është një akt antiqytetërues dhe primitiv thotë për rajonipress Jonuz Musliu.

Në një prononcim për rajonipress Jonuz Musliu tha se i ndjeri Hetem Bediu (foto), ka qenë banorë i Komunës së Bujanocit, si dhe ka qenë i pajisur me pasaportë të Serbisë, por ja që policia e Serbisë ka penguar familjarët e tij, ta varrosin prindin e tyre sipas amanetit dhe zakoneve shqiptare.

“Me këtë veprim qyqar të Beogradit, po shihet qartë se Serbia akoma nuk është liruar nga mentaliteti i mbrapshtë i regjimit diktatorial të Millosheviqit” tha Musliu.

Musliu tha se ky veprim jonjerëzor e johuman i policisë kufitare serbe është një provokim edhe për Qeverinë e Kosovës dhe ekipet teknike që merren rreth menaxhimit të kufirit, i cili për shqiptarët e Luginës së Preshevës, jo vetëm që po bëhet me taksa për të gjallët, por edhe pengesa kalimi edhe për të vdekurit.

“Shprehim ngushëllime familjarëve Bediu nga Dobrosini, duke u solidarizuar me dhembjen e tyre dhe shqetësimin, që nuk arritën ta varrosin prindin e tyre në vendlindje, gjithashtu mbështesim të drejtat e ankesës në instancat më të larta ndërkombëtare lidhur me këtë rast provokues dhe diskriminues”, tha për rajonipress-it, Jonuz Musliu, kryetar i Kuvendit Komunal të Bujanocit, njëherit edhe kryetar i Lëvizjes së Progresit Demokratik./rajonipress/

Shpërndaje.
© RAJONIPRESS

Vërejtje!

RajoniPress.com nuk do të botojë shkrime që nuk i përmbushin kriteret dhe standardet profesionale të gazetarisë bashkëkohore. Nuk do të ketë për askënd mbyllje apo censurë, por jemi të fokusuar që në këtë agjenci, lajmi, shkrimi, raporti, intervista dhe opinioni të plotësojnë kriteret profesionale. Gjithashtu opinionet, analizat, komentet, nuk duhet të shkelin parimet etike (gjuhën e urrejtjes, fyerjet, diskriminimet e çfarëdoshme).