Musliu: Në Medvegjë po vazhdon diskriminimi i shqiptarëve

Lëvizja e Progresit Demokratik, me liderin e saj Jonuz Musliu, njëherit kryetar i Kuvendit Komunal në Bujanoc, ka ngritur shqetësimin dhe reagimin e menjëhershëm për largimin nga posti i ndihmëskryetarit të Komunës së Medvegjës, Ismet Zeqiri.

Largimi nga funksioni i ndihmëskryetarit të Komunës së Medvegjës, Ismet Zeqirit, për shkak vizitës së tij në Obiliq dhe Mitrovicë, në cilësinë e një zyrtari të lartë komunal, në shenjë ndërkomunal e ndërrajonal, paraqet një akt jocivilizues dhe kundër proceseve integruese evropiane.

LPD, një akt të tillë të ngutshëm dhe të njëanshëm të autoriteteve të Komunës së Medvegjës, e vlerëson të dëmshëm dhe jo produktiv në ngritjen e marrëdhënieve fqinjësore mes komunave në Kosovës dhe Luginës së Preshevës.

LPD, gjithashtu, largimin e Ismet Zeqirit, nga posti i ndihmëskryetarit të Komunës së Medvegjës, në kohën kur, ai, ishte në pushim dhe zëvendësimi me një zyrtar tjetër, tregon qartë arbitraritetin e një pushteti, që akoma nuk është liruar nga logjika e dikurshme e regjimit të Millosheviqit, thuhet mes tjerash në reagimin e kryetarit të LPD-së, Jonuz Musliu./rajonipress/