Moore: Marrëveshjet të zbatohen

Kreu i Zyrës për Evropën Juglindore në Departamentin e Shtetit, Jonathan Moore, tha dje në një diskutim për Ballkanin në Washington se përparimi në dialogun Kosovë-Serbi është shumë më i madh se që ishte menduar. Por, shton se do të ketë ende punë për detajet dhe zbatimin e këtyre marrëveshjeve.

Moore vlerësoi zgjedhjet komunale dhe shprehu shpresën për një proces të rregullt për zgjedhjet në komunën e Mitrovicës.

“E rëndësishme është që raundet e zgjedhjeve në Mitrovicën Veriore dhe në të gjitha komunat e Kosovës kanë qenë në përputhje me legjislacionin e Kosovës dhe jo të ndonjë vendi tjetër”.

Ai tha se populli i Kosovës duhet të jetë krenar për sukseset që ka arritur, përfshirë marrëveshjen e Stabilizim-Asociimit që, siç tha ai, po e afron Kosovën me Bashkimin Evropian. /VoA/Telegrafi/