Milot Rashica, një ndër 5 surprizat në Holandë

Eredivisie pak ditë më parë luajti javën e 18’të, duke përfunduar kështu fazën e parë të kampionatit.Mediat holandeze në çdo prag fundviti, analizojnë gjithçka ka ndodhur deri në dhjetor, zbulojnë 5 surprizat e pjesës së parë të sezonit.

Mes emrave të përzgjedhur, është edhe ai i Milot Rashicës, 19-vjecarit të përfaqësueses U-21 të Shqipërisë që luan në radhët e Vitesses. Edhe pse në moshë fare të re, Rashica ka fituar vendin e titullarit, duke e shpërblyer besimin e trajnerit me 6 gola dhe një asist, shkruan SuperSport.al.

Në paragrafin rezervuar për talentin kosovar shkruhet:

“Një vepër arti e zbuluesve të talenteve të Vitesses. Rashica është me origjinë shqiptare dhe ka luajtur me të rinjtë dhe skuadrën e parë të Vushtrrisë në Kosovë. Gjatë vjeshtës së 2014’ës u pikas nga Vitesse dhe pasi impresionoi gjatë periudhës së provës firmosi në muajin shkurt të 2015’ës. Vitesse tani po dëfren me një lojtar krahu që është më i shpejtë se drita. Ka shënuar 6 gola dhe ka dhënë një asist gjatë këtij sezoni. Bashkë me Solanken konsiderohen zbulimet e Vitesses”.

Rashica renditet përkrah Christian Santos të NEC Nijmegen, Timo Letschert dhe Bart Ramselaar të Utrechtit dhe Kenny Tete të Ajaxit. Ai konsiderohet një thesar i çmuar për Vitessen, që me shitjen e kartonit të tij mund të arkëtojë shuma të mëdha në të ardhmen.