Mediat lokale: Liverpool kërkon Shaqirin

Zyrtarët e klubit anglez të Liverpoolit janë të vendosur që t’i bëjnë një ofertë kampionit të Europës, Bayern Munichut në lidhje me mesfushorin sulmues, Xherdan Shaqirin.

Pas humbi mundësinë që të blej mesfushorin ukrainas, Henrikh Mkhitaryan, i cili kaloi në radhët e Borussia Dortmundit, trajneri Brendan Rodgers ka identifikuar 21-vjeçarin shqiptar si objektivin e tij të ardhshëm të transferimeve, shkruan ueb-faqja lokale e qytetit të Liverpoolit, “thisisanfield”.

“The Reds” besojnë se ata janë në ‘pole position’ për të blerë reprezentuesin zviceran, pasi që kanë në dorë një ofertë e cila, sipas tyre, vështirë se mund të refuzohet nga ana e ekipit gjerman por edhe vetë Shaqës.

Megjithatë, Liverpool mund të përballet me të njëjtat probleme sikurse me rastin e Mkhitaryanit, nëse “The Reds” nuk do të jenë në gjendje që në të ardhmen tu ofrojnë lojtarëve Champions Leaguen.

Por, Shaqiri mund të pranoj ofertën e ekipit nga “The Anfield Road” pasi që në ekipin bavarez, megjithëse gjatë ndeshjeve parasezonale po shfaq lojëra fantastike, ai pritet të largohet në rast se ‘rekordmeister’ sigurojnë shërbimet e mesfushorit spanjoll të Barcelonës, Thiago Alcantaras.