Mbi 2.5 milionë turistë vizituan Shqipërinë

Vetëm fundjavën e shkuar janë regjistruar 59 847 të huaj që hynë në Shqipëri, kryesisht për turizëm.Derisa gjatë muajit korrik, vera e sivjetme turistike në Shqipëri ishte vlerësuar si e dështuar, muaji gusht e ka plotësuar këtë boshllëk. Sipas medieve shqiptare, më shumë se 2.5 milionë të huaj e kanë vizituar sivjet Shqipërinë.

Vetëm fundjavën e shkuar janë regjistruar 59 847 të huaj që hynë në Shqipëri, kryesisht për turizëm. Fluksi më i madh ka qenë nga pikat kufitare me Kosovën, bën të ditur abc-news.

“Muaji gusht ishte pozitiv për turizmin ku në krahasim me gushtin e vitit të kaluar kanë hyrë 62 222 të huaj më shumë”, thuhet në raport.

Për periudhën janar-gusht në Shqipëri kanë hyrë 2 milionë e 545 mijë të huaj, por statistikat flasin për një rënie të turistëve të huaj në vend me 236 462 më pak se viti i kaluar.

Lajmi i mirë është që u tejkalua situata problematike e shkaktuar nga reagimi i policisë kufitare greke, prej konfliktit me kishën ortodokse në Përmet.

Shefi për kufirin e Gjelbër, Genc Merepeza garanton se janë marrë të gjitha masat për përballimin e çfarëdolloj fluksi të mundshëm në pikat e kalimit kufitar.

Ndërkohë, që në Shqipëri vazhdojnë të jenë edhe grupet e përbashkëta me policinë rrugore të Kosovës, në ndihmë për disiplinimin e qarkullimit të mjeteve të turistëve kosovarë.