Lutfi Haziri: Mehmetali Behluli po rivarroset në Kodrën e krenarisë së Gjilanit

Gjilan – Në 22-vjetorin e rivarrimit të dëshmorëve të kombit të rënë në luftën për liri nga radhët e Ushtrisë Çlirimtare të Kosovës, nën përkujdesjen e kryetarit të Komunës së Gjilanit, Lutfi Haziri, sot është bërë rivarrimi i dëshmorit, Mehmetali Behluli, në bashkëpunim me Shoqatën e Familjeve të Dëshmorëve.

Në fjalën e tij, kryetari i Komunës, Lutfi Haziri, ka thënë se në kushte pandemie kjo datë e para 22 vjetëve ishte koha kur u bashkuan dëshmorët në një vend dhe në liri për të cilën ata dhanë jetën, sikur që edhe sot atyre u bashkohet edhe dëshmori Mehmetali Behluli, i cili ka rënë dëshmor kundër një regjimi barbar.

“Sot po bashkohet në këtë vend me dëshmorët tjerë edhe Mehmetali Behluli. Këtu në këtë vend ku pushojnë eshtrat e rezistuesve më të mëdhenj të lirisë së Kosovës. Por, mbi të gjitha, idealet e bashkimit janë ato që na kanë kryengritur në çdo kohë, sikur që është rasti i dëshmorit që sot e kthejmë te bashkëluftëtarët e tij, për të pushuar në Kodrën e krenarisë së Gjilanit, e cila bart jo vetëm dëshmorët, por edhe emrat e atyre që i kanë dhënë lavdi kombit. Këtu është vendi i krenarisë dhe lavdisë së kësaj pjese të Kosovës, i cili nuk do të pushojë deri sa të jetojnë të lirë kudo që gjenden shqiptarët. Gjaku i dëshmorëve është ujitja e lirisë së Kosovës dhe gjaku i tyre na bënë të kuptojmë se sa e rëndësishme është liria”, ka thënë mes tjerash kryetari Lutfi Haziri.

Ahmet Isufi, ish-komandant i Zonës Operative të Karadakut, ka thënë se dëshmori Mehmetali Behluli ka qenë i përgatitur dhe me vizion të qartë, duke përcjell amanetin e shumë gjeneratave dhe iu bashkua shokëve të tij në Zonën e Pashtrikut, jashtë vendlindjes së tij, por në atdheun e tij.

“Ata nuk e duruan jetën në robëri dhe i tillë është edhe Mehmetaliu, i cili iu bashkua radhëve të UÇK-së që të luftohet deri në frymën e fundit për të dhënë maksimumin e tij për të shijuar të gjithë së bashku lirinë e Kosovës. Ai sot u bë bashkë, sikur që dikur i gjallë u bashkua me vargun e luftëtarëve të UÇK-së, po bashkohet me vargun e Kadri Zekës, Rexhep Malës e shumë dëshmorëve të rënë për liri”, ka thënë mes tjerash Isufi.

Xhavit Jashari, kryetar i Shoqatës së Familjeve të Dëshmorëve të Luftës së UÇK-së, tha se pa luftën dhe sakrificën e tyre ne sot nuk do të ishim të lirë dhe pa gjakun e tyre ne do ishim të robëruar, të poshtëruar dhe të mbyllur.

“Dëshmorët e kanë thënë më së miri përmes sakrificës së tyre se liria është celësi i zhvillimit dhe ecjes përpara si popull dhe si shoqëri. Ata kanë rënë dëshmorë që ne të gjallët të jetojmë të lirë e bashkërisht të punojmë në zhvillimin e vendit. Të jemi të bashkuar, sepse lufta e UÇK-së është krenari e secilës familje dhe shtëpi të shqiptarëve. Varret e tyre, gjymtyrët e invalidëve dhe vuajtjet e familjeve të dëshmorëve janë dëshmia më e madhe e arkivave të UÇK-së”, ka thënë mes tjerash kryetari Jashari.

Në emër të shokëve të Brigadës 126 Hasi, ka folur Xhevdet Thaçi, i cili ka thënë se Mehmetali Behluli ishte i vendosur, guximtar, i besueshëm dhe i denjë në luftën për lirinë e Kosovës.

Në emër të familjes dhe të Këshillit të Fshatit Dobërçan ka folur Nexhat Ibishi, i cili ka falënderuar Komunën e Gjilanit për angazhimin dhe organizimin që ka dhënë për rivarrimin e këtij dëshmori dhe kontributin e vazhdueshëm për të gjithë heronjtë, dëshmorët, të rënët për liri dhe kujdesin e treguar për familjet e tyre.

Ceremonia e varrimit është bërë nën protokollin e Forcës së Sigurisë së Kosovës dhe institucioneve të shtetit.

Pas kësaj ceremonie, është bërë edhe zbulimi i pllakës së sheshit me emrin Hanumshahe dhe Tefik Zymberi, në lagjen Dardania, ku edhe gjenden bustet e dëshmorëve./rajonipress/