Lufta e UÇK-së është bazamenti i shtetit të Kosovës

Në kompleksin “Adem Jashari” në Prekaz, të Skenderajt, kanë bërë homazhe edhe presidentja e Kosovës, Atifete Jahjaga, kryeministri Hashim Thaçi, së bashku me kabinetin e tij.

Presidentja Jahjaga tha se lufta e lavdishme e UÇK-së, vepra e komandantit legjendar Adem Jashari dhe sakrifica e familjes emblematike Jashari dhe të gjithë të rënët në altarin e lirisë, është bazamenti se Kosova është shtet sovran dhe i pavarur.

Edhe kryeministri Thaçi, ka çmuar sakrificën e Jasharajve dhe gjithë të rënëve, për lirinë e Kosovës.

“Jemi këtu për të marrë edhe më tepër energji shpresë, optimizëm dhe besim, për të ardhmen…duke punuar sot të gjithë së bashku që në të ardhmen e afërt, Kosova të jetë në mënyrë të dinjitetshme dhe meritore pjesë e NATO-s, Bashkimit Evropian, por edhe Organizatës së Kombeve të Bashkuara” , ka thënë Thaçi. /Telegrafi/