LPD uron Kosovën për 6 vjetorin e Pavarësisë

Lëvizja e Progresit Demokratik, me rastin e 6 vjetorit të pavarësisë së Kosovës, ua uron institucioneve të saj dhe gjithë shqiptarëve, kudo qofshin ata, Ditën e shtetësisë dhe mëvetësisë së shtetit më të ri në botë.

Po, mbushen 6 vjet pavarësi të Kosovës si shtet, i cili gjithnjë e më shumë po njihet ndërkombëtarisht, po forcohet institucionalisht dhe po gëzon simpatinë e faktorëve ndërkombëtarë për rrugën e saj të drejtë, parimore e progresive.

Shqiptarët e Luginës së Preshevës i gëzohen zhvillimit dhe përparimit të Kosovës si shtet, duke përkrahur përkujdesjen që po tregon ajo ndaj bashkëkombësve të vetë në Maqedoni, Mal të Zi dhe Luginë të Preshevës.

Megjithëse rajoni i Luginës së Preshevës edhe më tej vazhdon të mbetet një vend me probleme politike e ekonomike, duke filluar nga pengesat në qarkullimin e lirë ndërkufitar, rreth mosrregullimit me ligj të përdorimit të lirë të simboleve kombëtare, mosrespektimin e Marrëveshjes së Konçulit, militarizimin e sërishëm të rajonit e kështu me radhë.

Për shqiptarët e Luginës së Preshevës, festa e pavarësisë së Kosovës, është një festë që bashkon shqiptarët, ashtu siç i ka bashkuar në luftë dhe paqe, e do t’i bashkoj edhe në të ardhmen rreth realizimit të aspiratave kombëtare, për të cilat u angazhuan dëshmorët e të gjitha kohëve thuhet në urimin e Jonuz Musliut kryetar i LPD-së dhe kryetar i Kuvendit Komunal të Bujanocit./rajonipress/