Loja e Thaçit me territore

Deklaratat e presidentit Hashim Thaçi për korrigjim të kufijve po vlerësohen si lojë e rrezikshme për Kosovën, pasi sipas opozitarëve dhe analistëve politikë një lojë e tillë çon në ndarjen e pjesës veriore dhe se kjo lojë po e dëmtonë pozicionin e Kosovës në arenën ndërkombëtare, shkruan sot Gazeta “Zëri”.

Pavarësisht se po vazhdon të zotohet se nuk do të ketë ndarje të Kosovës, presidenti i Kosovës Hashim Thaçi nuk po ndalet së pohuari se në kuadër të fazës finale të dialogut me Serbinë do të diskutohet për korrigjim të kufijve. Megjithëkëtë kreu i shtetit, i cili po i prin palës kosovare në dialogun e Brukselit, asnjëherë nuk ka saktësuar se çka do të thotë ky korrigjim.

Thaçi po ashtu tashmë ka bërë të ditur se në Bruksel do të diskutohet edhe për kërkesën e përfaqësuesve të Luginës për t’iu bashkuar Republikës së Kosovës. Mirëpo, përfaqësuesit e opozitës një gjë të tillë e kanë cilësuar si manipulim të pastër të presidentit Thaçi me shqiptarët e Kosovës Lindore.