Limaj: Nismës kanë dashur t’i bashkëngjiten 10 deputetë

Kryetari i subjektit më të ri politik, Nisma për Kosovën, Fatmir Limaj ka thënë se fillimisht kanë qenë dhjetë deputetë të Parlamentit të Kosovës që kanë dashur t’i bashkohen nismës së tij. Limaj thotë se Nisma është e hapur për të gjithë dhe paralajmëron se këtij subjekti politik do t’bashkangjiten personalitete shumë të rëndësishme nga skena politike dhe intelektuale e Kosovës.

Limaj thotë se askujt nuk i kanë kërkuar që t’i bashkohet Nismës, por mos bashkangjitjen e këtyre dhjetë deputetëve e arsyeton me faktin se Nisma për Kosovën nuk ka dashur të bëhet reprizë e PDK-së.

“Nëse do t’i marrshim dhjetë deputetë s’do të ishte Nismë e re. Më mire që kemi vazhduar kështu sepse duam që kjo Nismë e re të jetë e re”, ka thënë Limaj në Rrokum Tv.

“Nuk kemi dashur të bëjmë një lloj reprize të një grupi politik”, ka shtuar ai.

Limaj ka thënë se në Nismën për Kosovën do të ketë fytyra të reja të cilat nuk kanë pasur hapësirë nëpër parti tjera.

“Nisma për Kosovën do të jetë subjekt i hapur dhe i ri për t’iu dhënë njerëzve hapësirë pavarësisht në cilin grup do të jenë”, ka thënë ai. /RrokumTV/