LDK, mbledhë strukturat e partisë në Gjilan

Gjilan – Lidhja Demokratike e Kosovës, dega në Gjilan nën udhëheqjen e Kryetarit Lutfi Haziri, ka mbledhur strukturat e saja për të diskutuar lidhur me situatën në të cilën po kalon vendi. Haziri, ka njoftuar strukturat me situatën e përgjithshme në vend ndërsa përfaqësuesit e nëndegëve të LDK-së, janë interesuar veçmas lidhur me raportet e vendit tonë me Shtetet e Bashkuara të Amerikës dhe vendet tjera mike, ku këto ditë është raportuar për përkeqësim të miqësive tradicionale, andaj është bërë thirrje institucioneve qendrore të vendit që të kenë kujdes dhe mos të dëmtojnë këto miqësi të cilat falë politikes paqësore të Presidentit Rugova dhe sakrificës së popullit janë krijuar me shumë mund.

Kryetari Haziri, duke folur lidhur me ngjarjet tjera i ka siguruar ata se LDK do jetë gardian i ruajtjes së miqësisë me vendet aleate dhe ka njoftuar strukturat se në kuadër të kalendarit të aktiviteteve këtë të premte dega e LDK-së, në Gjilan, shënon 29 vjetorin e themelimit, duke uruar që përvjetorët tjerë Kosovën ta gjejnë më të avancuar politikisht dhe me zhvillim të duhur ekonomik.

Përkrahje e plotë i është dhënë Kryetarit Haziri për qeverisjen e mirë si dhe mbështetje në realizimin e projekteve kapitale për Gjilanin thuhet në njoftimin e degës së LDK-së në Gjilan./rajonipress/