LDK drejt zgjedhjeve, pa ‘qeveri nën hije’

Partia më e madhe opozitare, Lidhja Demokratike e Kosovës, mbetet pranë qëndrimit se afati më i mirë për organizimin e zgjedhjeve parlamentare do të ishte muaji qershor. Ndonëse shprehet e gatshme për zgjedhje edhe më herët nëse paraqitet nevoja, LDK-ja e konsideron qershorin si afatin më optimal.

Deri atëherë, kjo parti politike, e cila po shprehet bindëse se do t’i fitojë zgjedhjet dhe do ta marrë nën drejtim qeverinë e ardhshme të Kosovës, konsideron se do t’i bëjë edhe përgatitjet e fundit përbrenda saj, si në aspektin programor ashtu edhe në identifikimin e kuadrove që nesër do të merrnin nën drejtim resorët ministrorë.

Por, një duket të jetë e sigurt, Kryesia e LDK-së nuk mendon për zgjedhje të brendshme partiake, ashtu siç kërkon një pjesë e anëtarësisë së saj, përfshirë këtu kryetarin e nderit të kësaj partie, Fatmir Sejdiu. Sekretari i përgjithshëm i LDK-së, Ismet Beqiri ka potencuar se zgjedhjet në LDK do të mbahen sipas statutit, pas katër vjetësh nga kuvendi i fundit zgjedhor i partisë, që nënkupton kohën pas zgjedhjeve parlamentare.

Me këtë qëndrim, LDK mbetet e përcaktuar që në zgjedhje të shkojë me liderin aktual Isa Mustafa, i cili kishte shpalosur edhe ambiciet e tij për postin e kryeministrit. Beqiri ka thënë se aktualisht i gjithë potenciali po përqendrohet në zgjedhjet parlamentare…(Tribuna)