Kuvendi Komunal mban mbledhjen e dytë të rregullt, miratohen plani i punës dhe disa vendime të rëndësishme

Kamenicë – Kuvendi Komunal ka zhvilluar mbledhjen e dytë të rregullt, të kryesuar nga Kryesuesja e Kuvendit, Arbnore Beqirja-Fera. Në këtë seancë morën pjesë Kryetari i Komunës, Kadri Rahimaj, Nënkryetarja Arta Bajralija, asambleistët komunalë, përfaqësues të organizatave joqeveritare dhe qytetarë të interesuar.

Në rend dite fillimisht ishin paraparë për shqyrtim dhe miratim procesverbali nga mbledhja e kaluar e datës 30 janar 2026, pyetjet e legjislativit drejtuar ekzekutivit, si dhe Plani i Punës së Kuvendit Komunal për vitin 2026.

Po ashtu u shqyrtua propozim-vendimi për ndryshimin dhe plotësimin e vendimit për formimin e komisionit për përzgjedhjen e drejtorëve dhe zëvendësdrejtorëve në institucionet edukativo-arsimore të Komunës së Kamenicës.

Gjatë seancës, me propozim të Kryetarit Rahimaj, rendit të ditës iu shtuan edhe dy pika: shpallja në interes të përgjithshëm publik e një prone në pronësi të ndërmarrjes shoqërore N.T.SH “Qëndresa”, nën menaxhimin e Agjencisë Kosovare të Privatizimit, si dhe propozim-vendimi për zgjedhjen e delegatëve të Komunës së Kamenicës në Kuvendin e Asociacionit të Komunave të Kosovës (AKK).

Pas diskutimeve për secilën pikë, Kuvendi miratoi me shumicë votash të gjitha propozimet e paraqitura, duke i hapur rrugë zbatimit të tyre në funksion të zhvillimit institucional dhe interesit të qytetarëve të komunës./rajonipress/