Kurti: Thaçit po i mungon mbështetja politike, po keqpërdor Kosovën Lindore

Lideri i Lëvizjes Vetëvendosje, Albin Kurti ka komentuar fjalimin e presidentit serb Aleksandar Vuçiq, dhënë në Mitrovicë gjatë vizitës së tij të realizuar në Kosovë, vikendin që e lëm pas. Gjatë takimit të sontëm që pati me liderët institucionalë shqiptarë, bëhet e ditur se Albin Kurti ka thënë se Aleksandar Vuçiq dëshmoi se e kaluara kriminale është aktuale.

Përveç komenteve për presidentin serb Aleksandar Vuçiq, sipas kumtesës së Vetëvendosjes, Albin Kurti konsideron që Kosova Lindore po keqpërdoret nga Presidenti i vendit Hashim Thaçi.

”Në këtë takim u bisedua për rëndësinë e marrëdhënieve dhe bashkëpunimit sa më të mirë e më të gjerë ndërmjet Kosovës e Shqipërisë në të gjitha fushat: politike dhe ekonomike, institucionale dhe shoqërore”.

”Në veçanti, u diskutua për dialogun më të ri me Serbinë, për çfarë kryetari Kurti theksoi që, në njërën anë, fjalimi i presidentit të Serbisë në Mitrovicë dëshmoi që e kaluara kriminale është aktuale, ndërkaq, në anën tjetër, Kosova Lindore po keqpërdoret si karrem nga Presidenti Thaçi për të siguruar mbështetje politike e publike e cila i mungon aq shumë”.