Kurti e “amniston” Thaçin

Në planin e punës për vitin 2014 të Komisionit Parlamentar për Punë të Jashtme nuk është paraparë ftesa për raportim për kryeministrin Hashim Thaçi. Ky organ javën e kaluar ka miratuar planin e punës pa e paraparë asnjë ftesë për kreun e ekzekutivit. Kryetari i Komisionit, Albin Kurti, gjatë vitit të kaluar në vazhdimësi i ka bërë thirrje Thaçit që të vijë për raportim në komision, por ky i fundit ka injoruar gjitha ftesat e tij.

Pavarësisht kësaj lideri i Vetëvendosjes pretendon se i di arsyet pse Thaçi nuk i përgjigjet pozitivisht ftesës së tij.

Ai në deklaratat e mëhershme pati thënë se kryeministri ka frikë nga ballafaqimi në komision, pasi ka refuzuar disa herë ftesën e tyre për të raportuar rreth çështjeve të dialogut dhe takimeve tij me kryeministrin e Serbisë, Ivica Daçiq.

Sidoqoftë, i vetëdijshëm për injorimin e thirrjeve të mëhershme, Kurti kësaj radhe nuk e ka përfshirë fare në agjendë ftesën për raportimin e kryeministrit. Gjatë diskutimeve që komisioni ka pasur javën e kaluar për planin e punës, është përmendur raportimi i zëvendëskryeministrit, Behgjet Pacolli, ministrit të Jashtëm, Enver Hoxhaj, atij të Diasporës, Ibrahim Makolli, por jo edhe i kryeministrit…(Tribuna)