KPF mban mbledhjen e parë: Shqyrtohen pasqyrat financiare, buxheti 2026 dhe formimi i Këshillit të Sigurisë

Viti – Komiteti për Politikë dhe Financa (KPF) ka zhvilluar mbledhjen e tij të parë, në të cilën janë trajtuar një sërë çështjesh me rëndësi për funksionimin institucional të komunës dhe planifikimin buxhetor për vitin 2026.

Në hapje të takimit, kryesuesi i KPF-së, Bekim Azizi, i informoi anëtarët lidhur me vlerësimin e ligjshmërisë së akteve të miratuara nga Kuvendi Komunal, duke theksuar se shumica e dokumenteve të nxjerra janë konfirmuar si të ligjshme nga organet përkatëse.

Një nga pikat kryesore të rendit të ditës ishte shqyrtimi i pasqyrave financiare të buxhetit komunal për periudhën janar–dhjetor 2025. Anëtarët e komitetit analizuan nivelin e realizimit të të hyrave dhe shpenzimeve, si dhe ecurinë e projekteve kapitale, duke diskutuar mbi sfidat dhe prioritetet për vitin e ardhshëm fiskal.

Në vijim, u trajtua propozimi për caktimin e orarit të pagesës së takimeve të Kuvendit Komunal për vitin 2026, si dhe iniciativa për formimin e Këshillit Komunal për Siguri në Bashkësi, i cili synon forcimin e bashkëpunimit institucional në adresimin e çështjeve të sigurisë në nivel lokal.

Komiteti shqyrtoi gjithashtu propozimin për përfaqësimin e komunës në Asociacionin e Komunave të Kosovës, si dhe aprovimin e buxhetit të pjesëmarrjes për fermerët për vitin 2026. Ky program vlerësohet si mekanizëm i rëndësishëm për mbështetjen e sektorit bujqësor dhe fuqizimin e prodhuesve vendorë. Në këtë kuadër, u diskutua edhe raporti i progresit të programit aktual, duke u theksua nevoja për vazhdimin e përkrahjes financiare për fermerët.

Jashtë rendit të ditës, komiteti mori në shqyrtim edhe propozim-vendimin për ndërrimin e destinimit të parcelës me numër 1088-2, me sipërfaqe 17,758 m², në pronësi juridike të “D.S. Osnova Shkolla” në Sllatinë të Epërme. Sipas propozimit, një pjesë e kësaj parcele, në sipërfaqe prej 4,000 m², do të destinohet për ndërtimin e një qendre për kujdesin dhe edukimin e hershëm të fëmijëve (çerdhe).

Të gjitha pikat e trajtuara në këtë mbledhje u proceduan për shqyrtim dhe miratim në seancën e radhës të Kuvendit Komunal.

Gjatë diskutimeve, anëtarët e komitetit ngritën çështje me interes publik dhe parashtruan pyetje drejtuar ekzekutivit komunal, duke kërkuar transparencë dhe efikasitet më të madh në zbatimin e projekteve dhe menaxhimin e buxhetit./rajonipress/