Kosovën mund ta zhvillojë vetëm diaspora

Shumë afaristë shqiptarë që jetojnë në diasporë janë të interesuar të investojnë në Kosovë. Por, shteti i Kosovës duhet të bëjë më shumë lehtësime për ta.

Shteti i Kosovës mund të zhvillohet ekonomikisht vetëm nga shqiptarët që kanë krijuar kapital jashtë vendit. Kështu konsideron Naim Dedushaj, drejtor i Departamentit të Hulumtimeve dhe Përkrahjes së Investimeve të Diasporës – shkruan gazeta Tribuna.

Në një intervistë dhënë gazetës, ai ka folur për nevojën urgjente që shteti t’u krijojë masa lehtësuese afaristëve shqiptarë nga diaspora që të investojnë kapitalin e tyre në Kosovë. Sipas tij, deri më tani është bërë fare pak për të inkurajuar afaristët nga diaspora për të investuar.

“Deri më tani afaristët shqiptarë që jetojnë jashtë Kosovës nuk kanë pasur ndonjë lehtësim. Ata janë trajtuar njësoj si investitorët e huaj. Tani aspo është aprovuar ligji për investimet e huaja dhe kjo është pozitive, sepse jo që i dallon afaristët e diasporës, por edhe garanton dhe mbron investimet”, ka thënë Dedushaj.