Kosovari theret me thikë gjatë karnavaleve, arrestohet dorasi

Gjatë festës tradicionale të karnavaleve në Liestal, kantoni Baselland në vikendin e kaluar, rreth orës 23.15 të të dielës ka ndodhur një therje me thikë. Me këtë rast viktima, një kosovar 19 vjeçar ka pësuar plagë serioze në kofshë nga goditja me thikë dhe është dashur të operohej urgjentisht në spital po atë natë.

Ne kuadrin e hetimeve është identifikuar dorasi, thuhet në një njoftim të policisë Basellandit. Bëhet fjalë për një turk 22 vjeçar që jeton në regjionin e njëjtë. Ai ka pranuar veprën, transmeton albinfo.ch.

Ndërkohë Prokuroria e Përgjithshme e kantonit Baselland ka iniciuar procedurën penale kundër tij. Me këtë rast është kërkuar që hetimet ndaj tij të zhvillohen në Gjykatën për masa shtrënguese.