Komunat, pak të hyra

Komunat e Kosovës në periudhën 2010-2014 kanë pasur rezultate të ulëta të mbledhjes së të hyrave vetanake. Kjo për faktin se më shumë janë të varura nga niveli qendror për kryerjen e aktiviteteve të tyre. Kështu u tha në konferencën “Analiza e të hyrave vetanake në komunat e Republikës së Kosovës”, të organizuar nga Ministria e Administrimit dhe Pushtetit Lokal (MAPL) dhe Agjencisë së Shteteve të Bashkuara për Zhvillim Ndërkombëtar (USAID).

Sipas raportit “Analizë lidhur me të hyrat vetanake në komunat e Kosovës” thuhet se pjesëmarrja e të hyrave vetanake e komunave në të hyrat e përgjithshme të buxhetit të Kosovës në pesë vjetët e fundit është mesatarisht rreth 4,02%.

Sipas raportit pjesëmarrja e të hyrave në buxhetin e Komunës është në nivel të ulët, e cila varion nga 35,84% te Komuna e Prishtinës deri në 4,0% në Komunën e Novobërdës.

Ndërsa nga aspekti i planifikimit të të hyrave vetanake për kokë banori për periudhën 2010-2014 vërehet se ka një dallim shumë të madh në mes të komunave nga 540.8 euro në Komunën e Prishtinës deri në 56.4 euro në Komunën e Junikut./zeri/