Komuna e Kllokotit e përkushtuar për të qenë transparente ndaj qytetarëve

Gjilan- Në takimin e fundit të Këshillit Komunal për siguri në bashkësi në Kllokot e ku kanë marrë pjesë të gjithë akterët politikë, fetar e të sigurisë është thënë se gjendja në këtë komunë është e qetë dhe stabile. Refik Halili nënkryetar i komunës për komunitete tha për rajonipress se këto takime kanë synim transparencën ndaj qytetarëve dhe përfaqësuesve të fshatrave.

Refik Halili nënkryetar i komunës në Kllokot tha për rajonipress se në takimin e mbajtur të hënën të Këshillit Komunal për siguri në bashkësi e ku kanë marrë pjesë edhe FSK-ja, policia e Kosovës dhe të gjitha grupimet politike e fetare është vlerësuar se gjendja në Kllokot përkundër disa incidenteve të vogla ka qenë e qetë dhe stabile.

Halili tha se në këtë takim kanë marrë pjesë edhe përfaqësuesit e fshatrave shqiptare e serbe të cilët kanë paraqitur kërkesat e tyre që lidhen me investimet në infrastrukturë dhe krijimin e kushteve më të mira për punësim e shkollim.

Halili tha se nga ky takim është kërkuar që të gjithë akterët të angazhohen që Komuna e Kllokotit të ngrit edhe më shumë shërbimet dhe nivelin e mirë që e ka treguar deri më tani si në tatimin në pronë ashtu edhe tek të hyrat vetanake.

“Edhe pse jemi komunë e vogël megjithatë të arriturat janë të mëdha” tha Halili. Sipas tij Kllokoti ka treguar një performancë të mirë në fushën e menaxhimit , prokurimit dhe të hyrave vetanake. “Edhe nga ky takim Kllokoti është lavdëruar për mbështetjen që ka marrë nga USAID-i i cili ditëve të fundit e shpërbleu Kllokotin me një grantë domethënës” tha Halili.

Përfaqësuesi i policisë ndërkaq ka thënë se gjendja në Kllokot është e qetë dhe stabile dhe se policia është e përkushtuar që të ndihmojë të gjithë qytetarët e saj për të pasur një klimë të mirë politike dhe etnike./rajonipress/