Komuna e Kamenicës me bashkëpunim të ri për mbështetjen e grave sipërmarrëse

Kamenicë – Kryetari i Komunës së Kamenicës Kadri Rahimaj ka nënshkruar sot marrëveshje me Fondacionin për Zhvillim të Qëndrueshëm Ekonomik PREDA Plus, për projektin “HER FUTURE” (E ardhmja e saj)-Fuqizimi i Grave Sipërmarrëse në Kosovë.

Në këtë takim organizata “HER FUTURE” është përfaqësuar nga Valentin Hoxha që është edhe Drejtor i këtij projekti dhe nënshkrues i memorandumit.

Në takim kanë marrë pjesë edhe Nënkryetarja e Komunës së Kamenicës Arta Bajralija, drejtori i DZHED-së Edon Dërmaku si dhe Qendresa Kastrati, zyrtare nga po kjo drejtori.

Ky projekt financohet nga Ministria Gjermane për Bashkëpunim Ekonomik dhe Zhvillim.
Projekti synon fuqizimin e grave në Kosovë përmes zhvillimit të aftësive të tyre të biznesit, krijimit të rrjeteve mbështetëse dhe nxitjes së një mjedisi të favorshëm për pjesëmarrjen ekonomike të grave.

Projekti fokusohet në planifikim strategjik, rritje kapacitetesh dhe krijimin e hapësirave të dedikuara ku gratë sipërmarrëse mund të lidhen, të mësojnë dhe të rrisin biznesin e tyre, duke kontribuar kështu në barazi gjinore dhe zhvillim të qëndrueshëm ekonomik.

Ky projekt ka gjithsej 5 komponente dhe synon të ketë 562 përfitues, duke përfshirë këtu gratë sipërmarrëse, vajzat e reja si dhe përfaqësues nga institucionet qendrore dhe lokale, shoqëria civile e shoqatat e biznesit.

Projekti kap vlerën e 1,333,000 eurosh që do të shpërndahen në formë të 100 granteve për gratë në të gjithë Kosovën.

Komuna e Kamenicës do të informojë qytetarët me kohë rreth thirrjes se kur do të hapet si dhe rreth hapave për aplikimin./rajonipress/