Klasa e 13-të e tepërt, me ligjin e ri është paraparë që të hiqet

Nxënësit të cilët do të regjistrohen në shkollën e mesme për vitin e ri shkollor 2013-2014, nuk do të vijojnë klasën e 13-të. Me ligjin e ri për arsimin parauniversitar është paraparë që kjo klasë të hiqet. Zyrtarë të Ministrisë së Arsimit thonë se është parë më e arsyeshme që shkolla e mesme të përfundojë me klasën e 12-të. Ndërkohë, ekspertët thonë se klasa e 13-të ka qenë e tepërt.

Këshilltari dhe zëdhënësi i Ministrisë së Arsimit, Arbër Morina, thotë për Radio Kosovën, se ekspertët e arsimit të cilët kanë punuar ligjin e ri për arsimin parauniversitar, e kanë parë të arsyeshme që arsimi i mesëm i lartë të përfundojë me klasën e 12-të.

“Ky veprim do të merret me vet faktin që kur ka hyrë ligji i ri në fuqi, ligji për arsimin parauniversitar. Gjeneratat që kanë filluar me klasën e 13-të, ata do ta vazhdojnë dhe përfundojnë klasën e 13-të. Ndërsa gjeneratat që regjistrohen pas hyrjes në fuqi të këtij ligji do ta kenë vetëm mësimin vetëm deri në klasën e 12-të”, tha ai.

Ndërkohë, ekspertët e arsimit, thonë se klasa e 13-të nuk ka pasur ndonjë rëndësi të veçantë në sistemin arsimor. Eksperti Dukagjin Popovci, thotë se klasa e 13-të që nga fillimi ka qenë për të plotësuar njohuritë e nxënësve për arsimin profesional dhe nuk është paraparë që të gjithë nxënësit ta vijojnë klasën e 13-të.

“Me kohë kjo ka degjeneruar pak dhe pothuajse të gjithë nxënësit e arsimit profesional kanë vazhduar klasën e 13-të, ku kryesisht janë përsëritur njohuritë nga tri vitet e para të shkollës së mesme. Nga ky aspekt e shoh këtë hap si një hap pozitiv, ndërsa mënyrën se si është futur klasa e 13-të nga viti 2002 e konsideroj të gabuar”, theksoi Popovci transmeton RTK.

Sipas Popovcit, kohëzgjatja e shkollimit nuk e përcakton cilësinë, por e rëndësishme është se çfarë mësohet gjatë këtij procesi. Ai thotë se janë një numër i vogël i shteteve që kanë shkollim të obligueshëm 13-vjeçar. Ekspertët kanë parashikuar se 12-vjet janë të mjaftueshme për shkollimin e obligueshëm nëse organizohet mirë plan programi mësimor.