Kategoritë e injoruara të luftës

Po bëhen 17 vjet që nga përfundimi i luftës, por kategoritë e dala nga lufta e UÇK-së vazhdojnë të mos trajtohen në mënyrë të duhur. Përfaqësuesit e këtyre kategorive thonë se institucionet i injoruan duke mos ua zgjidhur statusin e tyre, duke harruar se drejtuesit e institucioneve janë ulur në kolltukë falë sakrificës së tyre.

Dhanë jetën në luftën e fundit, sakrifikuan gjymtyrët e trupit, mbetën invalidë, por edhe 17 vjet nga përfundimi i luftës kategoritë e dala nga lufta e UÇK-së, vazhdojnë të mos trajtohen nga institucionet ashtu siç e meritojnë.

Thonë se pos luftës, ata u desh të sakrifikojnë edhe një herë pas përfundimit të saj duke kërkuar rregullimin e statusit të tyre dhe të marrin atë që e meritojnë.

Veteranët e luftës së UÇK-së ende po ballafaqohen me probleme për t’i realizuar të drejtat e tyre ashtu siç u takon me ligj, ndonëse kjo, sipas tyre, është dashur të marrë fund vite më parë, por institucionet injoruan këto kategori.

Nuk u bë sa duhet për kategoritë e dala nga lufta

Xhavit Jashari, kryetari i Shoqatës së Familjeve të Dëshmorëve, thotë se për kategoritë e luftës së UÇK-së në përgjithësi nga institucionet e vendit nuk është bërë sa duhet.

“Sepse këto tri kategori janë kategoritë e veçanta që njihen edhe me ligj, sepse edhe kontributi e sakrifica i bënë të tillë. Megjithatë institucionet e vendit është dashur të jenë më të kujdesshme, të ndërgjegjshme, të përgjegjshme ndaj këtyre kategorive”, ka thënë Jashari për “Zërin”, duke shtuar se nuk është arritur atje për çka është bërë lufta./zeri/