Karateistet e Kosovës po shkruajnë historinë në Kampionatin Botëror në Hungari

Karateistet nga Kosova po shkëlqejnë në Kampionatin Botëror të Karatesë për Senior, i cili po mbahet në Budapest të Hungarisë. Kombëtarja e Kosovës nga katër ballafaqimet gjerë në finale ka pësuar vetëm një humbje ndaj Japonisë me rezultat 2-1, ndërsa ka mposhtur Francën, Zvicrën e Anglinë me rezultat 2-0.

E veçanta e Kombëtares së Kosovës është duke marrë pjesë tri karateiste nga qyteti i Gjilanit, Fortesa Orana, Vlera Qerimi, e Hatixhe Zejnullahu duke treguar kualitete të jashtëzakonshme në këto përballje me këto shtete tejet të forta. Gjilanaseve me të madhe ju ka ndihmuar edhe karateistja Albulena Gervalla nga Bardhoshi i Prishtinës.

Të dielën këto vasha të karatesë do të përballen në finalen e madhe me Kazakistanin e cila është një kombëtare mjaft e fort. Trajneri i karatesë, Alban Beqiri ndihet krenar me paraqitjen e vashave nga Kosova. “Në këto momente është nder i veçantë të jesh nga shteti i Kosovës, këto heroina na kanë bërë krenar duke treguar kulturë e kualitete në dyshemenë e karatesë. Në finale do të përballemi me Kazakistanin, ku të gjitha vajzat janë zotuar se do të japin maksimumin për të arritur tek medalja e artë”.

Beqiri, poashtu ka falënderuar Presidentin e FKK-së, z.Besart Baruti dhe Sekretarin e FKK-së, z.Nazmi Gashi./rajonipress/