Kapiteni Gjimshiti: Fitore e gjithë shqiptarisë, tani të sigurojmë vendin e parë

Pas kualifikimit në Euro 2024, në konferencën për shtyp pas ndeshjes ka folur edhe kapiteni i kombëtares kuqezi, Berat Gjimshiti.

Gjimshiti i cili është jo vetëm një futbollist i rëndësishëm për Shqipërinë, por edhe një karakter për t’u marrë shembull nga të gjithë.

“Besoj se të gjithë e kemi merituar. Nuk e fus veten para ekipit. Shpresoj që nuk do të bëhem kurrë ashtu. Falënderimi i shkon gjithë ekipit, stafit, FSHF-së, tifozëve. I kemi më të mirët në botë, në Moldavi kishin ardhur shumë për të na përkrahur. Fitore e gjithë shqiptarisë”, ka thënë fillimisht kapiteni i kombëtares shqiptare.

Për Shqipërinë kjo do të jetë hera e dytë që do të jetë pjesëmarrësë në një Kampionat Evropian, pasi paraprakisht kishte marrë pjesë në vitin 2016.

Gjimshiti u shpreh optimist se Shqipëria mund të bëjë më mirë se sa në vitin 2016, duke marrë parasysh cilësinë e ekipit.

“Cilësitë dhe mundësitë i kemi. Ndoshta sot nuk ishte ndeshja më e mirë, por presioni ishte shumë i lartë. Do të bëjmë shumë mirë në Gjermani, por kemi kohë të mendojmë. Të festojmë pak, të luajmë ndeshjen e radhës dhe të marrim vendim e parë, sepse e meritojmë”, deklaroi ai.

Për fund, Gjimshiti refuzoi të përmend ndonjë kombëtare me të cilën do të donte të ballafaqohej në Gjermani.

“Nuk e kam menduar fare. Gjëja më e rëndësishme ishte kualifikimi, ka kohë akoma për të menduar për shortin”, përfundoi 30-vjeçari./Telegrafi/