Kadriu takon Sindikatën e Pensionistëve në Gjilan

Gjilan – Kryetari i Aleancës për Ardhmërinë e Kosovës – Dega në Gjilan Rexhep Kadriu, sot gjatë ditës në selinë e tij ka pritur Sindikatën e pensionistëve dhe Invalidëve të Luftës në Gjilan.

Ky është takimi i dytë që Kadriu ka pasur me përfaqësues të kësaj sindikate, me qëllimin për të gjetur zgjidhje për kërkesat e tyre.

Kadriu ka thënë se që nga takimi i parë me sindikatën, ai bashkë me grupet punuese në kuadër të AAK-së kanë bërë strategji që ofrojnë zgjidhje për problemet me të cilat ballafaqohen pensionistët, ndërsa ka shtuar se shumë shpejtë këto strategji do të jenë publike për të gjithë.

Ai ka premtuar edhe njëherë përkrahje për pensionistët dhe ka thënë se me ardhjen e tij në pushtet, pensionistët do të jenë ata që do të kenë përkrahjen dhe mbështetjen më të madhe nga Kadriu.

Kryetari i Sindikatës së Pensionistëve dhe Invalidëve të Punës në Gjilan, Muharrem Bajrami, ka thënë se ndihen të nderuar që Kadriu nuk i ka harruar kërkesat e tyre dhe ka kërkuar një takim të dytë për shqyrtimin akoma më serioz dhe gjetjen e alternativave për plotësimin e tyre.

Ai ka thënë se në emër të të gjithë pensionistëve, falënderon publikisht kryetarin e AAK-së në Gjilan Rexhep Kadriu, që po e përkrahë këtë sindikatë duke shpresuar që ky kryetar të jetë shembull për liderët e mëparshëm, të cilët pensionistët i kanë lënë pothuajshe gjithnjë mbasdore.

Kadriu ka premtuar edhe takime të radhës me pensionistë, deri në përmbushjen e kërkesave të tyre thuhet në një njoftim të AAK-së dega në Gjilan./rajonipress/