Kadriu i AAK-së ka ndihmuar të gjitha kategoritë gjatë Ramazanit

Gjilan – Në shenjë respekti për muajin e shenjtë të Ramazanit, kryetari i AAK-së në Gjilan Rexhep Kadriu gjatë gjithë muajit ka shpërndarë pako ushqimore për familjet me gjendje të rëndë ekonomike.

Pako me gjëra ushqimore, në shenjë simbolike, janë ndarë nëpër të gjitha nëndegët e AAK-së si në ato në qytet, poashtu edhe nëpër fshatra, për një numër të madh të banorëve, pa dallim përcaktimi politik.

Kadriu ka thënë se janë ndihmuar të gjitha ato familje që kanë pasur nevojë për ndihmë dhe kjo nuk ka të bëjë aspak me faktin nëse janë ata AAK apo jo.

“Në radhë të parë ne jemi njerëz, prandaj edhe kemi konsideratë ndaj atyre që kanë nevojë për ndihmë, kështuqë si strukturë, jemi bashkuar për tu treguar solidarë me të gjitha ato familje në nevojë”, ka thënë Kadriu.

Ai ka thënë se tani që jemi në prag të festës së madhe të Fiter Bajramit, të bashkohemi me njëri-tjetrin dhe t`i ndajmë të mirat që i kemi, sepse o tani, o kurrë është koha për të qëndruar unik në raste të tilla.

Dega e AAK-së në Gjilan, ka rreth 60 nëndegë, ndërsa janë shpërndarë pako ushqimore nëpër të gjitha këto nëndegë, për pothuajse më shumë se 10 familje në secilën.

“Qëllimi i kësaj ndihme simbolike, është që të paktën këtë festë, ta festojmë me të njëjtat të mira ushqimore në tryezat tona dhe të tregohemi zemërgjerë me bashkëqytetarët tanë”, ka thënë në fund Kadriu./rajonipress/