Kadriu: Betohem se nuk do ta keqpërdor asnjë cent të qytetarit

Gjilan – Unë premtojë dhe betohem se nuk do ta keqpërdorë asnjë cent të qytetarit, por vetëm do të punojë për t`i ndihmuar ata, ku madje as pagën e kryetarit të komunës nuk do ta marrë, por do ta ndajë për qytetarët në nevojë, ka thënë Rexhep Kadriu.

Të enjten, Aleanca për Ardhmërinë e Kosovës – Dega në Gjilan, ka mbajtur tubimin e radhës në fshatin Gumnishtë e Epërme.

Kryetari i AAK-së dhe kandidati për kryetar të komunës së Gjilanit Rexhep Kadriu, bashkë me bartësin e listës së AAK-së Selami Xhemaili dhe kandidatët për këshilltarë komunal, janë pritur nga simpatizantë dhe banorë të fshatit, para të cilëve ka shpalosur programin qeverisës të Aleancës për katër vjetët e ardhshëm.

“Ne ja kemi nisur me punë, kemi nisur me kontakt me qytetarin dhe kemi arritur deri më sot të realizojmë 37 projekte. Është detyrë e kryetarit të komunës të vizitojë qytetarët, të shoh me çfarë hallesh ballafaqohen ata dhe jo të mbyllet në zyre dhe të punojë vetëm për përfitime të veta”, ka thënë kryetari Kadriu.

“Unë premtojë dhe betohem se nuk do ta keqpërdorë asnjë cent të qytetarit, por vetëm do të punojë për t`i ndihmuar ata, ku madje as pagën e kryetarit të komunës nuk do ta marrë, por do ta ndajë për qytetarët në nevojë”, ka shtuar kryetari Kadriu.

Kryetari Kadriu më tej ka folur edhe për prioritetet që ka Aleanca për fshatin Gumnishte, ndërsa i ka bërë thirrje qytetarëve që të votojnë ndryshimin, të votojnë një të ardhme më të mirë për ata dhe për fëmijët e tyre, të votojnë numrin 62 nëse nuk duan t`i kenë më problemet me të cilat janë ballafaquar këto gjashtë vjetët e fundit thuhet në njoftimin e degës së AAK-së në Gjilan./rajonipress/