Juria e “Fest Flaka” akuzon Hazirin për shkelje etike dhe profesionale

Dy anëtarët e jurisë së festivalit të muzikës “ Fest Flaka”, Naim Gjoshi dhe Besiana Mehmedi nuk e pranojnë vendimin e kryetarit të Komunës Lutfi Hazirit për anulimin e dhënies së çmimit “Fest Flaka” solistes Enkelejda Arifi. “Nëse kryetari merr kompetenca për heqjen e vlerës monetare sepse konsideron se është konflikt interesi, mund ta bëjë, por çmimi i parë i merituar i Enkeleda Arifit, dhënë nga juria profesionale është i pakontestueshëm dhe pa asnjë të drejtë që të anulohet, nga askush” thuhet në reagimin e lëshuar për medie.

Vendimi i kryetarit të komunës së Gjilanit për të anuluar dhënien e çmimit të parë për këngëtaren Enkeleda Arifi, ka nxitur reagimin e anëtarëve të jurisë së festivalit të muzikës popullore “ Fest Flaka” në Gjilan.
Kryetari i jurisë, kompozitori Naim Gjoshi dhe anëtarja Besiana Mehmedi, profesore universitare dhe këngëtare e kanë cilësuar vendimin të papranueshëm.

Ata vlerësojnë se anulimi i çmimit të parë nga ana e kryetarit të Komunës së Gjilanit z. Lutfi Haziri, nuk ka qenë kompetencë e tij dhe është një arbitraritet që shkel çdo normë juridike, profesionale dhe etike të festivalit.
“Për ne, Enkeleda Arifi është fituese e çmimit të parë në “Fest Flaka” 2014, ndërsa baza juridike në të cilën është thirrur kryetari i komunës për anulim të çmimit, është inekzistente. Nëse kryetari merr kompetenca për heqjen e vlerës monetare sepse konsideron se është konflikt interesi, mund ta bëjë, por çmimi i parë i merituar i Enkeleda Arifit, dhënë nga juria profesionale është i pakontestueshëm dhe pa asnjë të drejtë që të anulohet, nga askush” thuhet në reagimin e lëshuar për medie.

Gjoshi dhe Mehmedi thonë se juria i ka ndarë shpërblimet e këtij festivali, ekskluzivisht mbi baza artistike dhe mbi kritere profesionale të interpretimit dhe mbi këto baza u nda edhe çmimi i parë. Sipas tyre çmimi iu dha interpretueses Enkeleda Arifi edhe për nivelin interpretues tipik popullor edhe për tematikën e këngës që i përgjigjej më së miri karakterit të “Fest Flakës”.

Dy pjesëtarët e jurisë konsiderojnë se nuk ka qenë kompetencë e jurisë që të vlerëson nëse është apo jo konflikt interesi pjesëmarrja e ndonjërit nga konkurrentët pasi sipas tyre kjo mbetet në kompetenca të jurisë seleksionuese.

Kryetari i Komunës së Gjilanit, Lutfi Haziri dje (e shtunë) ka anuluar vendimin e jurisë për dhënien e çmimit “Fest Flaka” solistes Enkelejda Arifi, për të shmangur konfliktin e interesit, meqë ajo është zyrtare e Drejtorisë së Kulturës dhe ishte pjesë e Bordit organizativ të manifestimit “Flaka e Janarit”./KultPlus.com