Jahjaga ‘ngrin’ Amnistinë

Ligji për Amnisti, përfundimisht është pezulluar. Presidentja ka shfrytëzuar çastet e fundit të afatit kushtetues kur është dashur të veprojë, dhe e ka njoftuar Kuvendin se ky ligj duhet të presë fjalën e Gjykatës Kushtetuese, para se të rikthehet edhe një herë në Presidencë, me modalitetet e përcaktuara nga Kushtetuesja.

Nga Zyra e presidentes Atifete Jahjaga është konfirmuar se Kuvendit tashmë i është dërguar i gjithë komunikimi që e ka pasur Presidenca me Gjykatën Kushtetuese lidhur me këtë ligj, por nuk janë dhënë shpjegime të tjera.

“Zyra e Presidentes së Republikës së Kosovës e ka njoftuar Kuvendin e Kosovës me komunikimin që ka pasur me Gjykatën Kushtetuese për Ligjin për Amnistinë, që është kontestuar nga një grup deputetësh”, ka thënë shkurt për Tribunën, Arbër Vllahiu, zëdhënës i Presidentes Jahjaga.