Ja çfarë shkruajnë mediat britanike për Taulant Xhakën

Merkato e transferimeve është në pikun e saj. Shumë skuadra kërkojnë patjetër që të bëjnë ndonjë afrim të mundshëm, për të përforcuar ato pozicione në ekip që nuk kanë dhënë rendimentin e duhur në pjesën e parë të sezonit.

Media britanike “Telegraph” ka bërë një shkrim ku ka prezantuar disa futbollistë që do të jenë pjesëmarrës në “Euro 2016”, të cilët duhet të jenë në konsideratën e ekipeve angleze për ditët e fundit të merkatos.

Në këtë listë bëjnë pjesë lojtarë të mirënjohur si Miralem Pjaniç, por edhe mesfushori i Kombëtares shqiptare, Taulant Xhaka. Mesfushori kuqezi është ndër lojtarët që prestigjiozja britanike e ka pikasur si futbollist të vlefshëm për ta afruar në ekip cilado prej anglezeve në dritaren aktuale të transferimeve. Krahas Taulant Xhakës, mesfushori energjik i Bazelit është edhe shoku i tij i skuadrës në Zvicër, Birkir Bjarnson.

Islandezi shihet gjithashtu si një ndërhyrje e mirë në merkato nga kjo media. Artiom Dzubia, sulmuesi rus i Zenitit shihet mjaft i fortë fizikisht për të përballuar Premier Ligën. Një tjetër sulmues në listë është Arkadiuz Milik, polaku që luan aktualisht me Ajaksin dhe “Telegraph” e ka përzgjedhur për shkak të 14 golave të realizuar sezonin e shkuar.

Sugjerimi i radhës është Eran Zahavi i Makabit të Tel Avivit, mesfushor me tipare sulmuese dhe me veçori interesante për ligën angleze. Në portë është përzgjedhur gardiani i Rumanisë, Ciprian Tatarusanu, që aktualisht është pjesë e Fiorentinës.

Nga Austria është përzgjedhur futbollisti anësor Zlatko Jonuzoviç, që është pjesë e Verder Bremenit. Polaku Kamil Grosiçki i Renes dhe gjermani Matias Ginter i Dortmundit vijojnë në listën e sugjerimeve. Në fund, është mesfushori kuqezi Taulant Xhaka që përmendet për cilësitë e shfaqura me Bazelin e në kualifikuese me Shqipërinë dhe Miralem Pjaniç.